Rudina Hajdari mori një vendim që vrau ‘shpirtërisht’ PD-në, lidhur me mos bindjen për t’iu bashkuar grupit për djegien e mandatit. Të pakënaqur për këtë akt, që sipas gjithë gjasave ishte deri diku i pritshëm, kreu demokrat Basha nxori sekretarin e Përgjithshëm, Gazmend Bardhi, për të përcjellë lajmin e ‘shporrjes’ nga PD-ja.
Në deklaratën për media, ai citon se Rudina nuk përfaqëson më Partinë Demokratike. Një ‘shuplakë’ të fortë deputetja demokrate e ka marrë nga ana e qytetarëve, të cilët i kujtojnë marrjen e mandatit në sajë të PD, e babait të ndjerë, dhe jo falë aftësive të saj.
Ndryshe nga përballja e fortë nga demokratët, nga ana tjetër e medaljes qëndrojnë socialistët, të cilët e kanë përkrahur. Kreu i grupit parlamentar të Partisë Socialiste, Taulant Balla, është shprehur i entuziazmuar me vendimin e Rudina Hajdarit për të mos djegur mandatin. Balla ka deklaruar se me deputetët e ‘opozitës së re’ do jetë e lehtë të dialogosh.
“Unë nuk kam asnjë dyshim që gjithë ajo ç’ka tha Hajdari ekziston. Jemi në një situatë ku të gjithë e kuptojmë se ka filluar një proces zëvendësimi i mandateve të opozitës. Me deputetët e rinj të opozitës në Kuvend të mërkurën bëhen 9 apo 10 deputetë të opozitës, dhe jo një grup por mund të këtë dy grupe të deputetëve të opozitës në Kuvend dhe besoj se do kemi një dialog me ta. Janë të shumta ata që do të dalin përtej interesave të momentit të lidershipit të PD dhe LSI. Fjalët e zonjës Hajdati janë inspiruese”.
Në po të njëjtën linjë ka qëndruar edhe kryebashkiaku Veliaj, i cili i ka thurur lavde. Erion Veliaj ka përshëndetur vendimin e marrë prej deputetes demokrate Rudina Hajdari për të mos djegur mandatin e marrë nga qytetarët në kryeqytet, dhe përfaqësimin e tyre në Parlament.
