Rudina Hajdari, nga foltorja e Kuvendit tha sot se askush nuk mund ta gjykojë vendimin e saj, për të mbajtur mandatin e deputetit, dhe se do sjellë një model të ri në politikë.
Krahas protestës së opozitës, deputetja e PD-së u shpreh se është në politikë për të bërë hapa të sigurtë larg politikës së vjetër, dhe se askush nuk mund ta gjykonte për vendimet e marra.
“Askush nuk mund ta gjykojë vendimin tim, do bëj hapa të sigurtë larg politikës së vjetër. Në ditët dhe muajt që do vijnë, do kem propozime konkrete për ta kthyer vendin në normalitet. Unë dua të sjell një frymë të re parlamentare, që do t’i japë fund njëherë e përgjithmonë këtij tranzicioni”, tha ajo.
Me këtë mesazh, a mos lë të nënkuptuar se ajo do të krijojë parti të re?
Ndryshe nga ajo, vëllai i saj Kiri Hajdari ka qenë në krahë të Bashës në protestën e 16 marsit.
“Unë dhe vëllai im luftojmë për të njëjtin qëllim, ardhjen e demokracisë. Nuk kemi asnjë kundërshtim me njëri-tjetrin”, tha më herët Hajdari për mediat. Ashtu sikundër u reflektua, sot emocionet e ‘mbytën’ vajzën e deputetit të ndjerë, Azem Hajdari.
