Kryetari i Kuvendit, Gramoz Ruçi është treguar mjaft strikt në seancën e sotme plenare, teksa nuk ka lejuar të flasë përtej kohës së caktuar as kryeministrin Rama.
Rama replikonte deputeten Rudina Hajdari lidhur me çështjen e shembjes së Teatrit Kombëtar. Pasi i mbaroi koha 3-minutëshe edhe ai po vijonte të fliste, Ruçi nuk e toleroi dhe e mbylli menjëherë mikrofonin.
“Po e shfrytëzoj këtë replikë për t’iu lexuar një koment nga Facebook të një demokrati që nuk i kursen ato që ka për mua, por që në ato ditët pas tragjedisë Sheksiriane të shembjes së karakatinës Italiane shkruante këtë koment: (…)fitoj Edvini dhe na thatë na e futi Amerika, prandaj s’ka më llafe, zgjedhje o bura revoltë popullore. Ikët nga parlamenti po na ikën të gjithë bashkitë, po populli nuk u duk gjëkundi se u tretën dhe ato të bashkive që dilnin në proteste. Na thanë o burra hajde te unaza e re, u ngrysëm me muaj dhe e vetmja fitore qe një natë erdhi nga Vlora, i ra nga Elbasani…Aty mbeti vetëm libri i çunit të Fariut për Unazën, pas doli që lepuri na flinte te Teatri, Iku te Teatri dhe na doli që Luli e Kishte hallin te Reforma Zgjedhore”, tha Rama ndërsa iu pre fjala pasi i mbaruan 3 minutat në dispozicion.
Pas kësaj, ishte fjala e Hajdarit e cila tha me ironi se mund t’i jepte tre minutat e saj kryeministrit që të mbaronte fjalën.
“Doja t’jua jepja edhe tre minutat e mia, sepse ishit bërë për ujë të ftohtë. Teatri duhej diku tjetër dhe ajo aty. Ne duhet ta kishim ruajtur si monument kulturor. Por ju ja keni marrë shpirtin këtij vendi dhe këtij qyteti”, tha ajo.
