Zyrtarisht janë regjistruar 15 raste të reja në 24 orët e fundit. Janë kryer 162 testime nga të cilat janë konfirmuar 15 raste pozitive, përkatësisht; 10 raste në Tiranë, 3 raste në Shkodër dhe 2 në Kamëz, kontakte familjare dhe disa raste të reja në proces hetimi.
Sa i takon dy të prekurve në Kamëz, ata janë infektuar në një ceremoni mortore. Ministria e Shëndetësisë dhe Mbrojtjes Sociale u rikujton qytetarëve se funeralet përtej rretheve familjare të ngushta, nuk janë të lejuara, pasi janë rrezik për shpërndarjen e infeksionit.
Ministria kërkon bashkëpunimin dhe mirëkuptimin e qytetarëve, për të respektuar me rigorozitet masat në fuqi.
Me lehtësimin e masave nga ana e qeverisë, shpesh qytetarët janë parë bashkë në grupe, duke mos respektuar distancimin fizik. Pasojat janë përhapja e COVID-19, e duke sjellë edhe bilance negative.
