Presidenti Meta ka komentuar protestën ku mblodhi bashkë qindra qytetarë, që dënuan aktin e rëndë të përdhunimit të 15-vjeçares nga roja i shkollës në Babrru.
Kreu i Shtetit thotë se dhuna duhet të ndëshkohet, për të mos u kthyer në sistem. Meta i tërheq vëmendjen edhe Ministrisë së Arsimit, për të cilën thotë se duhet të jetë më e vëmendshme në parandalimin dhe denoncimin e këtyre rasteve tronditëse.
Lidhur me reagimin e djeshëm qytetar, ai shprehet se do ti mbështesë të gjitha nismat kundër çdo forme dhune.
Statusi
Kur çdo formë dhune tolerohet, justifikohet dhe nuk ndëshkohet nga shteti, atëhere dhuna kthehet në sistem!
Vlerësoj dhe e përshëndes reagimin e djeshëm qytetar në protestën marshim të organizuar dje në Tiranë, dhe do t’i mbështes e inkurajoj gjithmonë të gjitha nismat kundër çdo forme dhune dhe abuzivizmi.
Një shoqëri demokratike dhe sociale, nuk mund të ketë evolucion pa inkurajuar përpjekjet për fuqizimin e rolit të grave dhe vajzave, veçanërisht pa përmbushur detyrimet për mbrojtjen e të drejtave të tyre.
I bëj thirrje drejtësisë të mos vonojë në nxjerrjen e përgjegjësive për rastin e abuzimit të 15-vjeçares në Babrru, dhe nxis institucionet arsimore të jenë më të vëmendshme në parandalimin dhe denoncimin e këtyre rasteve tronditëse.
Një shoqëri si e jona, që familjen dhe vlerat e saj i vlerëson të shenjta, duhet të ngrihet e gjitha në këmbë për mbrojtjen e tyre! ??
