Ambasadori i Bashkimit Evropian në Shqipëri, Luigi Soreca ka komentuar vendimin e parlamentit holandez për rikthimit e regjimit të vizave me Shqipërinë.
Ambasadori tha se asgjë nuk ka ndryshuar dhe se shqiptarët vijojnë të lëvizin të lirë, por është Këshilli Evropian ai që do shqyrtojë raportin e qeverisë holandeze, e cila duhet të ketë statistika dhe fakte mbi pretendimet për rritjen e kriminalitetit.
Po ashtu, Soreca gjatë fjalës së tij i dërgoi edhe një mesazh qeverisë shqiptare, teksa kërkoi që së bashku me qeverinë holandeze të intensifikojnë bashkëpunimin mes tyre.
“Raporti i KE është i qartë se çfarë duhet të bëjë Shqipëria për integrimin e Shqipërisë në BE. KE do të bëjë vlerësimin e vet, kur qeveria holandeze të sjellë raportin e vet. Është shumë e rëndësishme të përmendim se është vet qeveria holandeze që nuk është shprehur nëse ka një lidhje mes krimit të organizuar dhe lëvizjes së lirë.
Prandaj do të duhen statistika për të provuar këtë. Asgjë nuk ka ndryshuar, pra vijon të udhëtohet pa viza në vendet e shengen. Ne i bëjmë thirrje qeverisë shqiptare dhe asaj holandeze që të vazhdojnë dhe ta intensifikojnë bashkëpunimin mes tyre. Udhëtimi pa viza është një arritje fantastike për Shqipërinë dhe për qytetarët e saj që prej 2010-ës. Ju e dini që unë e kam ndjekur këtë proces që prej 2010-ës, jam i bindur që autoritetet shqiptare do marrin masat e duhura që të ruhet kjo arritje”, tha Soreca. /Tirana Today
