Barcelona nuk ka folur asnjëherë zyrtarisht në lidhje me spekulimet se po tenton kthimin e Neymar në Camp Nou, por sot zëvendëspresidenti Jordi Cardoner është shfaqur para mediave duke lëshuar mesazhe të paqartë, sepse nga njëra anë mohon që Barça të jetë duke negociuar, por nga ana tjetër e pranon se nuk është befasuar nga lajmet se Neymar kërkon të kthehet në Barcelonë.
“Është e gabuar të thuhet që ne dëshirojmë ta kthejmë Neymar në Barcelonë dhe kemi hapur negociatat. Me sa kam lexuar e dëgjuar, më rezulton që është Neymar ai që e dëshironin rikthimin te Barcelona, jo e kundërta. Në këtë moment transferimi i tij nuk është temë dite. Të shohim”, tha Cardoner, i cili ndoshta edhe për arsye ligjore mohon çdo kontakt me Neymar.
“Dëgjoj të thuhet sikur e kemi blerë Neymar, por nuk është e vërtetë. Nuk jemi në kontakt me të. Neymar dëshiron të kthehet? Nuk habitem, ka shumë pak klube si Barça dhe Neymar dëshiron të zhvillohet te Barcelona”, shtoi Cardoner, i cili gjithsesi nuk e harron të shkuarën.
“Ka shumë gjëra që nuk më pëlqyen kur ai iku, ka shumë gjëra që duhen rregulluar. Neymar është lojtar i madh, por nuk duhet të harrojmë si u largua, nëse një ditë do paraqitet mundësia e rikthimit”.
