Italia është mbërthyer nga paniku për shkak të rikthimit të valës së dytë të Covid-19, teksa regjistrohen sërish shifra të larta.
Gjatë 24 orëve të fundit, autoritetet njoftojnë se kanë ndërruar jetë 630 pacientë, duke e çuar në 50.453 numrin e përgjithshëm të viktimave, që nga fillimi i pandemisë.
Gjithashtu, i lartë mbetet edhe numri i të infektuarve, ku brenda 1 dite janë konfirmuar 22 .930 raste pozitive.
Dita e sotme ka regjistruar dhe 31.395 pacientë të shëruar, dhe numri total i tyre që nga nisja e pandemisë është 584.493.
Pandemia ka shkaktuar në Itali si në të gjithë botën, vështirësi ekonomike për shumë familje e qytetarë italianë që kanë humbur vendin e punës apo jetojnë me një ndihmë ekonomike, për shkak të reduktimit të orarit të punës apo mbylljes së aktivitetit prodhues e ekonomik, nga normativ ligjor në luftën kundër infektimit nga Covid 19.
Sipas statistikave të publikuara sot nga Instituti italian i kërkimeve social ekonomike, Censis pandemia ka shkaktuar në Itali 5 milionë të varfër më shumë dhe ka vënë në vështirësi ekonomike 7.6 milionë qytetarë.
