Pasi ministrja e Shëndetësisë Ogerta Manastirliu deklaroi se rezultatet e një reparti të spitalit të Durrësit, ku ishte e shtruar 73-vjeçarja që vdiq sot nga koronavirusi, dolën negative, vjen një reagim nga personeli i këtij institucioni.
“Balkanweb” raporton se disa prej infermiereve, që ndodhen në karantinë, kanë deklaruar se ka qenë drejtoresha e spitalit ajo që i ka marrë në telefon dhe i ka dhënë lajmin e mirë.
Ndërkohë, një prej infermiereve kërkoi që të njihej me përgjigjen e analizave personalisht ndërsa një tjetër shtron pyetjen për faktin se pse duhet të rrinë në karantinë për 14 ditë.
“Na mori drejtoresha na tha që nuk ka asnjë të infektuar por analizat janë bërë individuale. Përgjigjet i duam individuale të na i nisin t’i shohim. Drejtoresha na tha që do të qëndrojmë për 14 ditë në karantinë. Nuk do të shkojmë në punë. Pse kur nuk jemi të infektuar duhet të qëndrojmë në karantinë për 14 ditë si repart? Kemi frikë për fëmijët, për jetën. Që prej ditës së djeshme jemi ngujuar dhe na thanë që duhet të bëjmë analiza shtesë se mos brenda 14 ditësh mund të shfaqet”, tha një prej infermiereve, shkruan “BW”.
