Situata në Shkodër është tensionuar pasi protestuesit kanë goditur me guri xhamin e selisë së Partisë Socialiste. Mes pjesëmarrësve ka edhe fëmijë, ndërsa organizatorët po përpiqen të qetësojnë situatën pasi ishte bërë thirrje për protestë marshim.
Marshimi ka nisur që nga sheshi “Luigj Gurakuqi” ndërsa marshimi pritej të përfundonte pikërisht në selinë e PS. Pasi situata u qetësua, protestuesit vendosën pankartat e tyre në derën e thyer të selisë, dhe kanë ngjitur në mur fotografinë e 25-vjeçarit Klodian Rasha, i cili u ekzekutua nga një efektiv policie në Tiranë.
Prej 3 ditësh në Tiranë dhe qytete të ndryshme të vendit janë organizuar një sërë protestash. Ministri i Brendshëm, Sandër Lleshaj njoftoi dorëheqjen nga posti 2 ditë më parë, por protestuesit nuk janë mjaftuar me kaq.
Ata kërkojnë edhe dorëheqjen e Drejtorit të Përgjithshëm të Policisë, Ardi Veliu, megjithatë kryeministri Edi Rama ka deklaruar se diçka e tillë nuk do të ndodhë, duke i etiketuar protestuesit, si lukubi halabakësh.
