Me titullin “Bulevardi i ri i korrupsionit”, revista franceze “Courrier des Balkans” i ka bërë jehonë protestave prej disa muajsh të banorëve të zonës në Unazën e re në Tiranë, pas skandalit me tenderin për ndërtimin e kësaj rruge. Ish-deputeti Klevis Balliu me një postim të tij në Facebook, shkruan: “Protesta e banorëve të Unazës së Re kapërcen kufijtë kombëtar. Sakrifica e tyre sublime në mbrojtje të shtëpive dhe pronave të tyre tanimë njihet nga e gjithë bota”.
Teksa ka publikuar foto nga shkrimi i revistës, Balliu shkruan më tej: “Është Courrier des Balkans që tashmë i ka kushtuar një shkrim të gjatë sakrificës 9- mujore të këtyre heronjve në Unazën e Re. Mediat ndërkombëtare shkruajnë qartë dhe prerë se shqiptarët po vidhen nga qeveria e tyre kriminale. Gishti i medias ndërkombëtare është drejtuar nga Edi Rama dhe oligarkët e tij si hajdutët e parasë publike nëpërmjet PPP. Courrier des Balkans është një revistë Franceze e specializuar, e që lexohet nga politikanët, diplomatët e studiuesit e interesuar për Evropën Juglindore”.
