Ndërsa frika është shtuar me rritjen e të infektuarve, qytetarët kanë edhe më shumë dyshime për një tjetër izolim. Kryeministri Rama, në një bashkëbisedim me gazetarët, ka apeluar ndaj qytetarëve që të respektojnë masat, për të shmangur një karantinë të dytë. Dje u dha vendimi për mësimin online të universiteteve. Kreu i qeverisë iu rikthye kësaj çështje. Ai foli sërish për mbylljen e shkollave, duke thënë se deri më tani, nuk ka një vendim të tillë.
“Të shmangim kolapsin e spitaleve. Të bëjmë të gjithë sa më shumë, respektoni masat që të mos kemi një mbyllje të dytë. Dua ta theksoj se çfarë hapet dhe mbyllet e vendosin autoritetet. Duke parë të dhënat dhe autoritetet e vendeve që ne ndjekim me shumë vëmendje për të mësuar sa më shumë, shkollat nuk konsiderohen një vatër e nxehtë por një hapësirë që si të gjitha hapësirat e tjera, ka potencial rreziku”, tha Rama.
