Shqipëria vazhdon të humbë vende në renditjen e FIFA-s. Institucioni më i lartë i futbollit botëror ka publikuar renditjen e muajit prill, pas zhvillimit të ndeshjeve të para të eliminatoreve të Europianit 2020 dhe kuqezinjtë kanë humbur sërish një vend.
Kombëtarja Shqiptare ka rrëshqitur në vendin e 62-të si rezultat u humbjes me Turqinë në ndeshjen e parë eliminatore të Euro 2020. Pavarësisht se sfida disfata e “Loro Boriçit” u pasua nga fitorja e thellë 0-3 në fushën e Andorrës, cilësia e dobët e kundërshtarit, krahasuar me Turqinë, bëri që kuqezinjtë të humbnin terren ne klasifikim.
Christian Panucci është larguar nga drejtimi i Kombëtares së Shqipërisë, por efekti i dështimeve të teknikut italian vazhdon të ndihet për kuqezinjtë, të paktën edhe këtë herë. E parashikueshme që renditja e Shqipërisë do të ishte më e ulët duke parë rezultatet e fundit të Panuccit, që nuk mund të mos reflektoheshin në klasifikim.
Triumfi ndaj Andorrës si duket nuk i ka mbushur mendjen institucionit të futbollit për ta mbajtur ekipin kuq e zi në vend numëro. Është për të ardhur keq, që edhe kundërshtarë modestë, të jenë para Shqipërisë (si Burkina Faso apo edhe Katari, skuadër kjo e fundit që e kemi mundur në miqësoren e 2016-tës).
Ndryshe ka Shqipëria, vijon ngjitjen muaj pas muaji Kosova, që mori dy barazime inkurajuese në “Fadik Vokrri”, 2-2 me Danimarkën në miqësore dhe 1-1 me Bullgarinë në eliminatoren e parë të Euro 2020. “Dardanët” nga vendi i 130-të ngjitën në të 127-in.
Ndryshime thuajse të pandjeshme sa i përket 10-shes më të mirë. Vazhdon të kryesojë Belgjika, e ndjekur nga Franca e Brazili. Anglia shkëmben vendet me Kroacinë, ndërsa Uruguai me Portugalinë. Më pas klasifikohen pa asnjë ndryshim nga një muaj më parë Zvicra, Spanja dhe Danimarka.
