Nëse shifrat e të infektuarve do të vijojnë me të njëjtën intesitet, atëherë Italia do të shkojë drejt një tjetër katastrofe. Zyrtarët italianë të shëndetësisë kanë deklaruar se ringjallja e rasteve me COVID-19, ka arritur në një “fazë akute”. Virologu italian Massimo Galli ka paralajmëruar se Italia ka dy javë kohë për ta parandaluar rritjen e shkallës së transmetimit të COVID-19, ose vendi rrezikon të ndjekë gjurmët e vendeve fqinje evropiane.
Për rrjedhojë, kjo do të sillte kufizime të ashpra, ose izolim. Kjo mbyllje do të shkaktonte probleme të rënda psikologjike tek popullata, e po kështu edhe një krizë edhe më të thelluar në ekonomi. Një mbyllje disa ditore s’do ti linte bizneset të ‘merrnin frymë’, e kjo përkthehet në shkurtimin e vendeve të punës.
Massimo Galli, drejtori i sëmundjeve infektive në spitalin Luigi Sacco të Milanos, tha se rritja e rasteve në Itali këtë javë, nuk vjen si rezultat i testimeve të shtuara, por për shkak të rikthimit të pandemisë në mesin e popullatës më të rrezikuar.
“Ne gjendemi aktualisht në një situatë, e cila na kujton atë që ishte dikur mjaft shqetësuese për ne”, u shpreh Galli.
Sipas tij, kufizimet e reja në mbarë vendin përgjatë dy javëve të ardhshme, nuk do të jenë të mjaftueshme. “Duhet të reflektojmë mbi këtë situatë brenda 15 ditëve”, tha Galli.
