Duke iu referuar Kodit Zgjedhor, dita përpara datës së zgjedhjeve dhe data e zgjedhjeve, deri në orën e mbylljes së votimit, formojnë atë që cilësohet heshtje zgjedhore. E për rrjedhojë, gjatë periudhës së heshtjes zgjedhore nuk lejohet asnjë lloj fushate zgjedhore nëpërmjet organeve të medias, si dhe zhvillimi i mitingjeve ose i veprimtarive të tjera zgjedhore të subjekteve zgjedhore.
Komisioni Qëndror i Zgjedhjeve, ka gjobitur me 2 milionë lekë Radio Televizionin Shqiptar. Kreu i KQZ, Ilirjan Celibashi, bëri me dije se RTSH ka paraqitur reklama politike më datë 24 prill, ditën e heshtjes zgjedhore.
“Vendos masë administrative, 2 milionë lekë gjobë për RTSH. Ky vendim hyn në fuqi menjëherë dhe postohet në fletoren zyrtare, kundër këtij vendimi mund të ankimohet në Kolegjin Zgjedhor, brenda 5 ditëve nga hyrja në fuqi”, tha Celibashi.
