Panioniosi ku aktivizohet sulmuesi shqiptar, Fiorin Durmishaj u mund në Kupën e Greqisë me rezultatin 4-2 nga PAOK-u, duke i dhënë në këtë mënyrë lamtumirën Kupës. Koha e rregullt u mbyll në barazim 2-2 ku një nga golat e Panioniosit u shënua pikërisht nga Durmishaj ndërkohë që në kohën shtesë, PAOK-u arriti fitoren.
Një nga golat u shënua me penallti e cila është kontestuar ashpër nga lojtarët e Panioniosit që ishin të bindur se nuk kishte asnjë penallti. Këtë e ka treguar edhe Durmishaj që ka hezituar të rinisë takimin nga mesfusha duke duartrokitur në shenjë ironie skuadrën kundërshtare si edhe për mediat, tha se dikush donte që të eliminohej skuadra e Panioniosit.
“Ne dhamë më shumë se 100% dhe jam krenar për skuadrën, klubin dhe shokët e mi. Iu kërkoj falje tifozëve të Panioniosit pasi e kuptuam mirë lojën dhe donim të sulmonim shumë. Pasi barazuam 2-2, kishim besim te kualifikimi por pësuam një gol me penallti dhe dikush duhet të mbajë përgjegjësi për atë që ndodhi.
Jam shumë i turpëruar për atë që po ndodh te futbolli grek. Disa persona nuk donin që të kalonim ne më tutje. Nuk ishte aspak penallti ajo që po them unë. Ndërsa sa për të ardhmen time kam dëgjuar shumë por kam kontratë edhe për një vit me klubin tim dhe në verë do të shoh. Respektoj skuadrën dhe jam i Panioniosit deri në vitin 2020”, tha Durmishaj.
