Duket se beteja mes Berishës e Bashës është për jetë a vdekje. Ora e përballjes po afron, ndërsa fryma opozitare është ringjallur si kurrë më parë. Ish-kryetari i PD-së në Tropojë, Azgan Haklaj, i është rikthyer edhe një herë Kuvendit të Bashës në 18 dhjetor, duke e cilësuar si sofrën e bashkimit. E sa i takon referendumit për shkarkimin e Bashës, Haklaj e ka krahasuar me firmat piramidale.
Kjo lëvizje e Berishës vjen në një kohë kur kryedemokrati Basha ka deklaruar se po më 18 dhjetor do të mbledhë demokratët në Kuvendin e PD-së, aty ku do të diskutojnë dhe marrin vendime të rëndësishme për të ardhmen e tyre. Haklaj ka hapur arkivat, duke i nxjerrë të “palarat” deputetit demokrat Tritan Shehu, që sot mbështet “Foltoret” e Berishës, por dikur e ka vënë me “shpatulla pas murit”.
Një muaj më parë, Tritan Shehu i ka thurur lavde Berishës, ndërsa shprehej se “Foltorja” shkundi PD-në. Për të, “Foltorja” është momenti më i shëndetshëm për PD-në. Eshtë momenti i shkuarjes deri te anëtari më i thjeshtë i Partisë Demokratike, kudo në Shqipëri.
Ky personazh që sot është krahu i djathtë i Berishës, dikur e ka akuzuar. Azgan Haklaj është kujdesur për të risjellë në fokus një video e cila daton në 7 dhjetor 1999, ku Shehu në atë kohë zëvëndës kryeministër, akuzonte Berishën për lidhje të drejtpërdrejta me firmën piramidale “Gjallica” dhe ish bosen e saj Shemsie Kadria. Shehu, në videon në fjalë citonte se brenda Partisë Demokratike, asnjë veprim nuk bëhet pa dijeninë e Berishës, pasi ai vendos për gjithçka.
Ja se çfarë shkruan Azgan Haklaj
“Referendumi” i 18-të dhjetorit si firmat piramidale
Kuvendi kombëtar legjitim, konform statutit të PDSH-së me dt 18-të dhjetor në Pallatin e Kongreseve është sofra e bashkimit.
Të dashur miq!
Dëgjojeni anëtarin e regjencës që u fabrikua në kryefoltoren e 11-të dhjetorit e që do të rithemelojnë PD-në.
Ky është njëri prej revolucionarëve paqësorë konservator’ që do të rithemelojë PD- në konservatore dhe do të riformatojë të djathtën, por që erdhi si vandal për të pushtuar selinë e PD-së,e në fakt iku me bisht ndër shalë.
“Referendumi” i dt 18- të dhjetor do të jetë si firmat piramidale të Sudes, Alimuçës, Xhaferit që denoncon Tritani, dishepulli i enverizmit, sot i berishizmit.
Demokratë e demokrate të Shqipërisë!
Me dt 18- të dhjetor ejani në Pallatin e Kongreseve e Sheshin Nënë Tereza.
Mbi 5200 delegatë kanë konfirmuar pjesëmarrjen.
Dhjetëra mijëra demokratë nga gjithë Shqipëria do të injorojnë “referendumin” e regjencës dhe do të vijnë për të mbështetur kuvendin legjitim të PDSH-së.
