Kryeministri Edi Rama, ka folur rreth vrasjes së Kostandinos Kacifas, i cili u ekzekutua një vit më parë nga forcat policore shqiptare, në fshatin Bularat të Gjirokastrës.
Rama, i cili ndodhet në forumin e BE-Ligës Arabe në Greqi, ka dhënë një intervistë për Euronews, ku ka folur edhe në lidhje me këtë çështje.
Sipas tij, dikush që lëviz me armë dhe kërcënon njerëzit, është i rrezikshëm. Ndërsa shton se nuk mendon se vdekja e Kacifas, do të çojë në konflikt të vazhdueshëm mes komunitetit grek dhe shqiptar.
“Kam besuar dhe besoj se dikush që lëviz me armë dhe kërcënon njerëzit është i rrezikshëm. Unë nuk mendoj, përkundrazi besoj se historia e të dy komuniteteve tregon që, nëse politika nuk ndërhyn, ato janë një. Prandaj, nuk ka ndarje ose urrejtje në zemrat e komuniteteve, ku shqiptarët dhe grekët kanë jetuar bashkë për shumë vite.
Ata janë një shembull i ndritshëm se si politika duhet të merret me faktin se ne jemi fqinj dhe jemi “të mallkuar” për të jetuar bashkë dhe për ta dashur njëri-tjetrin. Kështu që, nëse politika nuk fut hundët dhe nuk përpiqet të ushqejë urrejtje, asgjë e keqe nuk mund të ndodhë”, tha kreu i qeverisë.
