Kryetarja e Urdhrit të Farmacistëve të Shqipërisë, Diana Toma, ka reaguar pas lajmit se një anëtar i këtij institucioni ka rezultuar pozitiv me koronavirus.
Në një intervistë për ABC News, Toma deklaroi se rasti është evidentuar që ditën e enjte dhe një ditë më pas ata kanë mbyllur zyrat.
Ajo theksoi se kanë kërkuar që të premten që t’u bëhet tamponi anëtarëve të tjerë të stafit, por që deri më tani nuk ka marrë asnjë përgjigje.
“E kemi mësuar të enjten, të premten kemi mbyllur çdo lloj veprimi me farmacistët. U lidhëm me drejtoreshën e DSHP, e cila për hir të së vërtetës u tregua e gatshme pastaj nuk patëm më kontakte. Kuptojmë që situata është e ngarkuar e personelit mjekësor. Derisa të mundësohet bërja e tamponit të tërë jemi të vetëkarantinuar.
Realisht këtu do të kërkonim një parje ndryshe. Kërkuam mundësimin e tamponeve ditën e premte, mirëpo nuk u realizua dhe ndonëse na u komunikua që do ketë një kontakt nga epidemiologët me stafin tonë, kam komunikuar edhe me anëtarë të tjerë të stafit, deri tani një komunikim i tillë nuk është realizuar.
Jemi 9 veta që janë në zyrë, të cilët jo të njëjtë janë në kontakt me farmacistët, por kjo nuk të jep siguri. Deri tani nuk kanë pasur simptoma. Edhe personi pozitiv është në gjendje të qëndrueshme, pa temperaturë”, tha ajo.
