Kryeministri Edi Rama, pas mbledhjes së grupit të PS-së, shkoi te spitali i Traumës për të parë nga afër gjendjen e qytetarëve që po marrin mjekim pas tërmetit të fuqishëm që tronditi dje vendin. Në një pronocim për mediat, ai tha se çdo dëmtim do verifikohet, dhe se qytetarët nuk duhet të shqetësohen për plasaritjet e banesave. Duke iu referuar fluksit, kryeministri shtoi se është përballuar me sukses, dhe se kujdesi ka qenë maksimal.
“Fluksi i parë ishte i madh, është përballuar me sukses. Nuk ka qenë një goditje fatale, dhe përgjithësisht plagët e marra dhe problemet e natyrës mjekësore nuk kanë qenë ekstreme. Kujdesi ka qenë maksimal. Numri i të lënduarve ka rënë fare. Secili prej atyre që vazhdojnë të jenë në spital, është një njeri që meriton gjithë vëmendjen”, tha Rama.
Strukturat kanë mundur ta përballojnë situatën?
Përgjigjen e dhashë, e kanë parë të gjithë që kemi qenë të organizuar menjëherë, sepse qoftë Ministrja e Shëndetësisë, ajo e Mbrojtjes, apo prefektët kanë punuar me trajnime të protokollëve që janë gati për emergjencat. Gjithçka ka funksionuar mësë miri. E mira s’ka fund asnjëherë, por gjithçka është përballuar mësë miri.
Do vazhdojë shqetësimi?
Periudha e menjëhershme pas tërmeteve shoqërohet me ankth, pasiguri, stres dhe nevojën e madhe për t’iu komunikuar të gjithëve që duhet sa më shumë qetësi, dhe pak durim se situata është e kapërcyeshme. Nuk kemi humbje njerëzish, as dëmtime të strukturave të banimit të atilla që të kenë lënë familjet pa strehë. Çdo dëmtim do verifikohet, njerëzit nuk duhet të shqetësohen për plasaritjet. Kush ka frikë të qëndrojë në shtëpi, ka në dispozicion hapësira të tjera.
