Kryeministri Edi Rama është prononcuar për mediat pas zhvillimit të diskutimeve në Samitin e BE-së, teksa në konferencë për shtyp u shfaq krah homologëve të tij Aleksandër Vuçiç dhe Dimitar Kovacevski. Ai ka reaguar ashpër nga Brukseli, në drejtim të Bashkimit Evropian.
“Faleminderit që jeni këtu dhe më lini të shpreh keqardhjen e thellë për BE-në. Më vjen keq për ta dhe shpresoj se mund t’i ndihmojmë. U përpoqa ti them disa gjëra në takim dhe do të ndaj me ju disa prej tyre, sepse nuk dua të marr aq kohë sa u mor në takim. Charles Michel më tha se kemi 3 minuta, por unë i thashë se do shërbenin edhe 30 sekonda po të kishin mbajtur fjalën ndaj 3 minuta s’ishin mjaftueshëm.
I thashë se ndihesha mirë dhe keq, se isha me ata. Mirë se jemi europianë, por keq se ne nuk mund të jemi këtu si evropianë por si miq në një shtëpi të ndarë. Dhe është diçka vërtet shqetësuese”, tha Rama.
Kryeministri Edi Rama e konsideron veton e Bullgarisë si një pretekst për të mos hapur negociatat me Shqipërinë dhe Maqedoninë e Veriut.
“M’u desh të fitoja një mandat të tretë për të pritur çeljen e negociatave për anëtarësim. Arsyeja nuk është thjeshtë Bullgaria. Bullgaria është fatkeqësi, por është fryma e deformuar e zgjerimit. Bullgaria është shprehja më dukshme e saj. Fryma e zgjerimit ka kaluar nga vizioni i një komuniteti, tek marrja peng e shteteve individuale. Sa herë ndodh një gjë në një shtet anëtar, atëherë vendoset në funksion ky mekanizëm. Është turp, ndërkohë që në oborr të Europës ka një luftë.
Më pas thonë, Vladimir Putini është shumë sëmurë. Ai mund të jetë mirë ose shumë sëmurë, por vendi këtu nuk është mirë. Agresioni rus kundër Ukrainës po merr një ndihmë bujare nga një vend i NATO-s, nga Bullgaria, për të destabilizuar një vend tjetër të NATO-s, Maqedoninë e Veriut. Pra, nuk do të presim Godonë.
Unë e kam thënë më parë, më vinte keq për disa njerëz që thonin dje që po ia dalim. Nuk erdha këtu me idenë se do ndodhte diçka. Vladimir dhe Estragoni janë bashkë, Shqipëria dhe Maqedonia është bashkë. Vladimiri i thotë Estragonit, do lëvizim apo jo?”, tha Rama.
