Kryeministri Edi Rama i ka bërë thirrje deputetëve të PS-së që të reflektojnë dhe të punojnë si skuadër, për të marrë mandatin e tretë vitin e ardhshëm.
Gjatë fjalës së tij para grupit parlamentar, Rama tha se duhen “mbledhur të gjitha energjitë e nevojshme për të nisur sezonin e fundit të këtij mandati të vështirë dhe sfidues”.
“Uroj për të gjithë të jeni sa më mirë në këtë periudhë të vështirë. Sezonin e sapo kaluar na u desh të përballemi edhe me një tërmet shkatërrues edhe me një pandemi globale që vazhdon, a thua se nuk na dilnin dhe tepronin sfidat e punës sonë në kthesën e fortë ku e kemi futur Shqipërinë për ta nxjerrë në një lartësi të re.
Tërmeti dhe pandemia janë nga ato ngjarje që tundin tokën. Sot nuk jemi mbledhur për këtë, këtu, jemi mbledhur që t’ju ftoj në një reflektim të thellë por të shpejtë, të cilin sot, dua që ta nisim për ta kryer bashkarisht, së bashku në grupe me të vogla, si do ta vijojmë përpjekjen tonë në çdo drejtim, si skuadër dhe individë dhe si do ta kurorëzojmë këtë mandat me bindjen për të merituar një mandat tjetër, të tretin radhazi, për të parën herë në histori”, tha ai.
