Pas takimit me kryeministrin grek, Kyriokos Mitsotakis, kryeministri Edi Rama, ka zhvilluar një takim me presidentin e Serbisë, Aleksandar Vucic.
Në një intervistë për mediat serbe, Vuçiç tha se ka diskutuar me Ramën dhe kryeministrin e Maqedonisë së Veriut, Zoran Zaev, për heqjen e barrierave për bizneset dhe lehtësimin e lëvizjes së njerëzve e shërbimeve.
Sipas mediave serbe, Vuçiç është shprehur se është diskutuar edhe për një ‘Shengen të vogël’, që pritet të formohet nga: Shqipëria, Serbia dhe Maqedonia e Veriut.
“Ajo që diskutuam është se duam të jemi më specifikë. Ne duam të krijojmë lidhje më të thella politike dhe ekonomike dhe të paraqitemi para BE-së si një bllok, sesa individualisht”, u tha Vuçiç gazetarëve.
Kosova nuk përfshihet në këtë marrëveshje dhe i pyetur nga gazetarët, Vuçiç u shpreh: “Është e rëndësishme për Serbinë që Prishtina të përfshihet në këtë proces”.
Ideja e të ashtuquajturit “Shengen ballkanik” qarkullon prej vitesh, por janë Kosova dhe Mali i Zi që e kundërshtojnë ashpër, pasi e konsiderojnë këtë veprim si një përpjekje për rikthimin e ish-Jugosllavisë.
