Pak më herët, kreu i shtetit Ilir Meta sulmoi qeverinë e Edi Ramës për largimin e intelektualëve nga vendi. Meta deklaron se referendumi i 25 prillit do të jetë vendimtar për të ardhmen e Shqipërisë, jo për 4 vitet e ardhshme, por për dekadat që vijnë.
Në kundërpërgjigje, kryeministri Rama thotë se raporti ku flet për emigracionin e personave me aftësi të larta në punë, është përdorur nga Meta për politikë. Organizata për Bashkëpunim Ekonomik dhe Zhvillim (OECD), në një raport të vitit 2020 konstatoi se Shqipëria renditej e katërta në botë për rritjen në normën e emigracionit të personave me aftësi të larta në punë për periudhën 2000/2001 deri në 2015/2016.
Në lidhje me këtë problematikë që është trajtuar nga ana e presidentit, Rama thotë se propaganda me largimet e shqiptarëve është një shëmti e madhe, që tregon karakterin e natyrën e vërtetë të opozitarëve tanë.
Statusi
Por një raport me të dhënat e 5-6 viteve më parë, i përdorur për politikë kundër qeverisë sot nga Presidenti i Republikës, është fiks argumenti pse shqiptarët në 25 prill duhet ta shqelmojnë jashtë organizmit politik të Shqipërisë ndërmarrjen private të LSI-së! Çfarë degradimi!
Propaganda me largimet e shqiptarëve është një shëmti e madhe, që tregon karakterin e natyrën e vërtetë të opozitarëve tanë! A thua se Iliri, Saliu apo Luli e Monika nuk ishin në pushtet me vite të tëra dhe po këta do t’i kthejnë shqiptarët nga rruga, me kallamin e tyre magjik!
