Rama është shprehur i prerë se për hapjen e listave nuk vendosin ndërkombëtarët, por vetë shqiptarët dhe parlamenti do i miratojë në datë 30 korrik, pasi e do shumica e popullit. Ai deklaroi në Kuvend se PS nuk detyrohet nga askush, veç njerëzve që përfaqëson.
Mjaft i vendosur në qëndrimin e tij, kreu i qeverisë u shpreh se nuk jemi superfuqi, por një vend i vogël. Por kur vjen puna për listat, këtë nuk e vendosin ndërkombëtarët, por politika shqiptare.
“PS-ja nuk detyrohet nga askush, veç njerëzve që përfaqëson. Dëgjova që Këshilli Politik e paska krijuar një aleancë globale SHBA-BE-OSBE, nuk është e vërtetë. E ka krijuar vullneti ynë, i PS-së, që është shumicë.
PD-ja që kërkon të qeverisë, ende nuk di të flasë shqip. Kjo ka qenë një gjë që i kam kërkuar Bashës në 2017, jo më anglisht, është turp i botës. Nuk na respektojnë miqtë dhe partnerët nëse u japim bujarisht detyra që janë tonat.
Ne nuk jemi shërbëtorë të askujt, jemi të ndërgjegjshëm se nuk jemi as SHBA, BE, as superfuqi bërthamore, por një vend i vogël, falë edhe miqve dhe partnerëve tanë.
Por vjen puna do të hapim apo jo listat, këtë e vendosim ne, se pastaj do të ishte fundi. Këtë e vendosim ne.
Dhe nuk kemi asnjë problem që ta diskutojmë dhe t’ua themi, sikur ua kemi thënë dhe besoj do të vazhdojmë ta themi kur të jetë e nevojshme. Por nuk besoj se do të jetë e nevojshme për një kohë të gjatë. Ky Kuvend do të hapë listat në 30 korrik, kjo është marrëveshja”, tha Rama.
