Kryeministri Edi Rama ka publikuar në Facebook videon e një vajze shqiptare e cila është e infektuar me COVID-19 dhe aktualisht gjendet e vetëizoluar në shtëpi, me zero kontakt njerëzor.
Ajo i bën thirrje të gjithëve që të qëndrojnë në shtëpi.
“Nuk kemi pasur kontakte me njerëz të infektuar, nuk kemi pasur kontakte me njerëz të ardhur nga jashtë, nuk kemi pasur kontakte me njerëz të cilët kishin shfaqur simptoma.
Nuk e dimë nga e kemi marrë virusin. Kjo do të thotë që tashmë nuk janë rrezik potencial vetëm ata persona të ardhur nga Italia, apo persona që kanë pasur kontakte me ta, por shumë më shumë njerëz. Është një rrezik të cilin ne nuk mund ta shohim. Ky virus nuk është shaka, po ua thotë dikush që po vuan pasojat. Po ua thotë dikush që ka dikë të shtruar në spital”, thotë ndër të tjera vajza e prekur nga koronavirusi.
Kryeministri Rama i drejtohet me një mesazh publik vajzës në fjalë, duke i thënë se meriton një falenderim të megjithëzemërt, për fjalët e thjeshta, të vërteta e të ndjera.
Reagimi i plotë i Ramës: “Ti zemër do ia dalësh padiskutim dhe unë jam me ty, të gjithë ne jemi me ty, deri kur të shërohesh plotësisht!
Por ti meriton edhe një falenderim të megjithëzemërt, për fjalët e thjeshta, të vërteta, të ndjera, që ke ndarë me të gjithë ne, sot kur të gjithë kanë nevojë të dëgjojnë dhe disa prej nesh, kanë akoma nevojë të kuptojnë që jemi në një luftë botërore për jetën, jo në një lojë kukamçefthi, ku kemi të drejtën të mërzitemi e të ankohemi pse po e kufizojmë skajshmërisht lirinë tonë!
Ti nuk ke nevojë për kurajo, sepse dalja jote publikisht tregon se kurajon e ke të jashtëzakonshme, kështu që unë nuk mund të të jap kurajo ty, po dua të të falenderoj për kurajon që ti më dhe mua me fuqinë magnetike të brishtësisë tënde?
Përqafime nga larg dhe me patjetër do të takohemi kur të mbarojë lufta❤
Edi”.
