Rama porosit ekipin: Mbushjuani mendjen të gjithëve, mos lini derë pa trokitur

Kryeministri Edi Rama zhvilloi një takim në qytetin e Durrësit, me të rinj të cilët do të votojnë për herë të parë.

Gjatë fjalës së tij, Rama shprehu mirënjohjen për patronazhistët dhe aktivistët që kanë kontribuar për Partinë Socialiste.

Kreu i qeverisë tha se ata duhet të trokasin derë më derë, dhe të takojnë çdo njeri.

Edi Rama: ”Unë ju jam shumë mirënjohës ju dhe të gjithë patronazhistëve dhe aktivistëve nga e gjithë Shqipëria. Fitorja jonë vjen nga besimi nga i gjithë qelizave tona të pathyeshme. Përpara se t’ju them disa fjalë për Durrësin, dua t’ju them sot këtu se në këtë ndeshje mos lini derë pa trokitur, mos lini njeri pa takuar. Përballë çdo kujt që e ndjeni të dorëzuar dhe të mërzitur, kapini nga dora dhe shpjegojani se edhe ju nuk jeni të lumtur. Secili e ndjen peshën, stresin dhe tkurrjen e kësaj periudhe të jashtëzakonshme.

Për këtë arsye jemi ne këtu, na shtyn përpara pakënaqësia. Gjërat duhet të shkojnë edhe më mirë. Ne të vetëm jemi të humbur, sa më shumë të jemi, aq më shumë do të ngjitemi në majën që Shqipëria meriton. Kjo arrihet me punë, me punë. Maja është e arritshme, duke mos harruar se duhet energji e madhe dhe mbi të gjitha duhet forca për t’i thënë këmbëve vazhdo, edhe kur thonë u lodhëm, për t’i thënë zemrës vazhdo, edhe kur thotë po plas.’