Nga oborri i inceneratorit të Elbasanit, kryeministri Edi Rama është shprehur i bindur për një fitore të një mandati të tretë. Në ftesën që pati për të gjithë, për t’iu bashkuar PS-së, Rama tha se sa herë kjo parti ka drejtuar vendin, ka ecur përpara.
Ai shtoi se sa herë që PD ka marrë në dorë çelësat e shtëpisë, e ka bërë shtëpinë rrëmujë. Ndërsa PS ka vendosur rregull në shtëpi. Kreu i qeverisë ka paralajmëruar se nëse në zgjedhje fiton PD, vendi ka rrezik të kthehet mbrapsht.
“PS e ka pasur dhe do e ketë pavarësisht se kush është lideri, prirjen për t’u vetëripërtirë, për t’u modernizuar, për t’u hapur dhe për t’u shtrirë.
PS ka humbur, jo se e kanë mundur të tjerët, por se ka mundur vetveten, se nuk ka qenë në lartësinë e sfidës apo të nevojës për të mos lejuar që vendi të kthehet pas dhe vendi është kthyer pas here që atyre u është dhënë mundësia që të bëjë.
Nëse kthehemi pas dhe shohim të gjitha zgjedhjet, do të shohim si në një film të përsëritur që kur PD merr në dorë çelësat, e bën shtëpinë rrëmujë. Dhe kur PS ka në dorë çelësat e shtëpisë, në shtëpi vendoset rregulli. Kjo është baza”, tha Rama.
