Kryeministri Edi Rama në një intervistë televizive deklaroi se “opozita në Shqipëri e ka humbur mundësinë e artë për të ngritur stekën”.
“Opozita fatkeqësisht ka humbur mundësinë e artë për të ngritur stekën e nivelit të vet.
Është e vetmja opozitë nga të gjitha ato që unë kam ndjekur, nga të gjitha shtetet, që flet për çuarje prapa hekurave, për dosje në prokurori, për korrupsion në tendera. Asaj i është dhënë mundësia të bëjë diçka ndryshe, dhe të marrë informacionin prej nesh… për të qenë pjesë e një tryeze.
Në këtë fazë së paku Presidenti i Republikës, po bën gjënë e duhur”, tha Kreu i Qeverisë.
Ndër të tjera, kryeministri u ndal tek masat dhe lehtësimi i tyre, duke paralajmëruar sërish kufizime, nëse do të rritet numri i të infektuarve:
“Ne duhet të na bëhet e zakonshme të sillemi në mënyrë të jashtëzakonshme, të mësohemi me një sërë ritualesh të reja, sepse në të kundërt do të duhet të përballemi me pasoja të tmerrshme.
Do të jetë një realitet i ri, i ndryshëm nga ai që kishim. Nëse do të ketë sërish numër të lartë infektimesh, do duhet të kthehemi mbrapsht.
Gjithçka në këtë situatë është relative dhe përtej asaj që duket, ka mundësira të ndryshme për të parë. Gjërat mund të marrin rrjedha të ndryshme, në varësi se si do të sillen njerëzit.
Do të kemi virusin mes nesh dhe nuk do të kemi normalitet, por do të hyjmë në një fazë, ku do të kemi një lloj normaliteti të ri me një numër të caktuar kufizimesh”.
