Kryetari i Bashkisë së Tiranës, Erjon Veliaj, ministri i Rindërtimit Arben Ahmetaj, kryeministri Rama ishin të pranishëm në kantierin e ndërtimit të projektit të “Bregut të lumit” në kryeqytet.
Në fjalën e marrë në nisje të punimeve për ndërtimin e një lagje të re në Tiranë, ku do të jetojnë të prekurit nga tërmeti, kreu i qeverisë Rama nuk la pa thumbuar opozitën. Kryeministri Edi Rama thotë se është meritë e qeverisë së tij, përballimi i pasojave të tërmetit dhe pandemisë.
Qeveria ka hapur kantierin e parë të punës për një nga lagjet e reja të Tiranës. Në ceremoninë e nisjes së punimeve tek lagjia “5 Maji” në Tiranë, që njihet dhe si zona e “Bregut të Lumit”, kryeministri Edi Rama u shpreh se më shumë do bëhet.
“Janë dy goditje njëra pas tjetrës, që sot mund ta them me plot gojën që askush tjetër, marr parasysh se e dimë se kush janë aktorët dhe faktorët në dispozicion në stolin e rezervave e të politikës shqiptare, nuk do të kishte mundur ti rezistonte.
Ne po i rezistojmë me forcë, durim dhe sukses ditë pas dite. Covidi mund ta kishte përmbysur gjithçka, mund të kishte detyruar Shqipërinë të futej në një gjendje thjesht mbijetese duke i lënë mënjanë të gjitha planet e të nesërme, madje duke harruar se ka të nesërme.
Në fakt dëgjojnë përditë, se kjo është ftesa që na bëhet nga ana e atyre që janë në stolin e rezervave, dhe që duan të rikthehen në krye të punëve të vendit të cilët insistojnë me këmbënguljen e atij që nuk sheh përtej hundës së vet. Nuk ka asnjë vizion për të nesërmen, se ne duhet ti shpenzojmë të gjithë për të përditshmen duke shtyrë çdo ditë në emër të lloj lloj teorive dhe ekspertëve si ai që u shfaq dje”, tha ai.
Rama iu referua edhe deklaratës së një mjeku, që u publikua një ditë më parë nga kreu i PD, Lulzim Basha. Kryeministri tha se një infermier nuk mund të promovohet si ekspert dhe të japë mend për një situatë si kjo e pandemisë.
“U shfaq dje si një mjek që duhej dëgjuar me gojë hapur dhe u prezantua nga vetë ai që pretendon të jetë kryeministri i vendit. Në fakt ishte një infermier, me gjithë respektin.
Por një infermier nuk mund të promovohet si ekspert dhe të japë mend për një situatë si kjo e covidit, ku siç e shohim i janë marrë mend shkencës botërore. Është një tragjedi më vete kjo qasje destruktive dhe brutale e verbërisë e atyre që fatkeqësisht nuk i kemi përballë. Por i kemi prapa dhe duan të na tërheqin prapa me një marrëzi që mishërohet në figurën dhe gjestin e Monika Kryemadhit, e cila thotë se virusi nuk ekziston.
Ne do të përballemi në front, edhe me sfidën e rindërtimit dhe do ta fitojmë këtë sfidë për ata që presin të kthehen në shtëpi”, u shpreh kryeministri.
