Rama-Metës: S’ke asnjë kompetencë të fusësh hundët në punët e ekspertëve

Duket se kryeministri Rama nuk e ka mirëpritur edhe aq mirë letrën publike të Metës, ku kërkonte të dinte se çfarë po ndodh me situatën në vend, lidhur me shtimin e infektimeve si pasojë e koronavirusit.

Kreu i qeverisë nënvizon se janë ekspertët ata që vendosin për hapat që duhen ndërmarrë çdo ditë, në bazë të strategjisë vjeshtë-dimër.

Pas konsultimeve edhe me ekspertët e fushës, Rama thotë se rritja e numrave sa i takon infektimeve, është brenda parashikimeve.

Por mbi të gjitha duhet shmangur me çdo kusht një mbyllje të re. Mjaft i drejtpërdrejtë, Rama i drejtohet kreut të shtetit se duhet të jetë ai i pari, që të zbatojë rregullat e thjeshta.

Statusi

Ministrja e Shëndetësisë meriton përkrahje pa rezervë për punën e palodhur që po bën, siç e meritojnë ekspertët dhe padiskutim mjekët e infermierët që po shkëlqejnë prej muajsh në këtë luftë, ku e tërë bota po vuan nga të njëjtat probleme e dilema të mëdha vendim-marrëse! Ekspertët janë ata që vendosin për hapat që duhen ndërmarrë çdo ditë në bazë të strategjisë së vjeshtë-dimrit. Rritja e numrave është brenda parashikimeve dhe ne duhet të shmangim me çdo kusht një mbyllje të re, prandaj secili, ti i pari, duhet të zbatojë rregullat e thjeshta! Ilir ti s’ke asnjë kompetencë të fusësh hundët në punët e ekspertëve për menaxhimin e situatës mjekësore! Si fillim mos dil vetë pa maskë nga shtëpia,mblidh edhe partinë tënde që të mos bëjë thirrje histerike kundër maskës dhe shiko punën që ke se vetëm atë s’po bën prej kohësh!