Sikundër Franca, edhe Gjermania pritet të ashpërsojnë masat e kufizimit, teksa rritet numri i të infektuarve me koronavirus nëpër Evropë. Mjekja Marsela Ceno, e cila punon në Gjermani, tregoi për “Dita jonë” në A2 situatën që po përjeton ky vend javët e fundit, pas rritjes së rasteve me Covid-19.
Ajo tha se po përballen me valën e dytë, dhe një situatë e rënduar është në spitale. Mjekja e konsideroi si një situatë tejet alarmante, ndërsa spitalet po përballen me një fluks të shtuar, gati e papërballueshme.
“Po përballemi me valën e dytë, por ka një pjesë të popullsisë që nuk e kupton rëndësinë e situatës dhe proteston kundër masave shtrënguese, ndërsa ne në spital po ndjejmë rritjen e numrit të personave të shtruar. Kemi 6-7 pacientë në ditë në terapi intensive, dhe duke parë rastet e reja jemi në një situatë alarmi”, tha Ceno.
Sipas saj, “nëse tendenca nuk ulet, edhe Gjermania do të gjendet përballë situatës që përjetoi Italia gjatë valës së parë”.
Sa i përket vaksinës, mjekja thotë se fillimisht janë personat e rrezikuar që do ta marrin, ndërsa vaksinimi në masë duhet të presë.
