Avokati Spartak Ngjela është shprehur se Rama ka ndjekur tezën e Thaçit dhe Vuçiç në lidhje me shkëmbimin e territoreve mes Kosovës dhe Serbisë.
Përmes një statusi në “Facebook”, Ngjela shkruan se politika amerikane nuk e ka pranuar asnjëherë Ramën, ndërsa shton se po të dojë e varros Ramën bashkë me idenë për copëtimin e territorit të Kosovës në favor të Serbisë.
Sipas tij, nëse amerikanët godasin hapur kryeministrin si bashkim me politikën serbe për aneksimin e territorit të Kosovës, ai merr fund për tri ditë.
Postimi i plotë i Ngjelës:
Nuk ka as më të voglin dyshim që Rama ka ndjekur idenë e presidentit të Serbisë Vuçiç dhe presidentit të Kosovës Thaçi, për copëtimin e territorit të Kosovës në favor të Serbisë.
Por, pyetja nuk bëhet më për Thaçin, se ai nuk ka më të ardhme në Kosovë; por çështja shtrohet për Ramën.
Politika amerikanë asnjëherë nuk e ka pranuar Edi Ramën. Natyrisht ky mospranim nuk ka qenë në një masë aq drastike sa mospranimi që politika amerikane i ka bërë Sali Berishës. Por, gjithsesi, edhe ky për Ramën ka qenë e mbetet një mospranim.
Po tani, pas goditjes që Rama mori në Berlin?
Tani politika amerikane po të dojë e varros Ramën bashkë me idenë e coprimit të terrirorit të Kosovës, sepse tani dihet botërisht që ajo ka qenë një ide e presidentit të Serbisë, Vuçiç.
Nëse politika e lartë amerikane e godet Ramën hapur si bashkim me politikën serbe për aneksimit e territorit të Kosovës, Edi Rama merr fund për tri ditë.
Por, a do ta bëjë politika amerikane këtë?
Të shohim, se këtu ka një gjë: pas gjithë këtyre viteve mospranimi, politika amerikane e ka në dorë tani që ta dëbojë Edi Ramën përfundimisht nga politika shqiptare.
Tani që kundërshtari i politikës amerikane, Berisha, ka ikur, dhe jo pa meritë të politikës amerikane, a do t’ia heqë shqiptarëve Amerika edhe zgjedhën Rama?
