Kryeministri Rama, duke folur përmes shifrave ka treguar se sa do të rriten rrogat aq shumë të përfolura të mjekëve dhe infermierëve. Gjatë një vizitë në maternitetin e ri të Beratit, kreu i qeverisë Rama është shprehur se pagat për stafin mjekësor do të rriten me 40%. Shifër kjo që për kryeministrin e vendit është mjaft e konsiderueshme. Ndonëse ende nuk dihet shifra finale, Rama tha se premisat janë që të arrijnë në 40%.
“Janë projekte shumë cilësore. Qershia mbi tortë është ndërhyrja që do bëjmë për pagat e personelit shëndetësor. Do jetë rritje e konsiderueshme. Nuk e kemi ende shifrën finale, por besoj se do arrijmë në 40%. Do kemi rritje 40%”, u shpreh Rama.
Gjatë muajit gusht, gjatë takimit që ka zhvilluar me stafin e bluzave të bardha të Spitalit Infektiv, Rama garantoi se do rritet buxheti.
“Ne duam që të realizojmë një rritje pagash që të jetë e konsiderueshme, jo vetëm 5%-7%. Ne po bëjmë kalkulimet e fundit. Përtej bonusit 1000 Euro që merrni ju, po flas për të gjithë infermierët e Shqipërisë. Ta fusim në buxhet dhe ta bëjmë fakt qysh në fillim të vitit të ardhshëm”, tha Rama.
