Pas largimit nga televizioni ‘News 24’, ku drejtonte emisionin ‘Të paekspozuarit’, gazetari Ylli Rakipi pritet të bëjë rikthimin e tij në një tjetër media.
Burimet për Politiko.al, shprehen se Rakipi është në bisedime me ‘Syri.net’, por nuk është akoma diçka e sigurt.
Lajmi për largimin e moderatorëve, Adi Krasta dhe Ylli Rakipi u bë i ditur vetëm pak ditë më parë, ku ky i fundit i ftuar në një intervistë për Ora News, shënjestroi kryeministrin Rama si shkaktar për shkarkimin e tyre.
“Problemet reale u shumëfishuan kur u publikua skandali me tenderin e Unazës së Re. Problemet reale nisën pas një interviste që unë bëra me kryeministrin Edi Rama në zgjedhjet e kaluara. Ishte një intervistë shumë e vështirë, dhe që aty Edi Rama mori vendimet e tij. Dhe vendimi i parë ishte urdhri i prerë që askush të mos marrin pjesë në emisionin “Të Paekspozuarit”. Nuk ka rast në botë kur shefi i propagandës së kryeministrit të marrë masa se kush shkon në emision. Mua më ka llogaritur si Kadriun e parë. Këtë gjuhë bullizmi, fyerje është vështirë të gjesh tek diktatorë të klasit të lartë”, tha Rakipi.
