Në një ditë mjaft të rëndësishme për opozitën, Rama ka zgjedhur të zhvillojë një miting në Selenicë të Vlorës.
Sigurisht, gjatë fjalës së tij, ai nuk ka harruar të thumbojë partinë kundërshtare, teksa ka shtuar se partia e tij ka provuar se di të bëjë shtet:
“Treguam se vendosmëria jonë është ajo çka i duhet Shqipërisë për të hapur një faqe të re në historinë e saj. Ndërkohë ata që janë ngujuar në bunkerin prej plastmasi për turpin e tyre nga frika e drejtësisë, është vërtetë dëshpëruese të shohësh një parti që lindi nga shpresa e madhe për Shqipërinë si gjithë Evropa të pushtojë bulevardin e të ngujohet aty për ti ndërprerë rrugën aspiratës së popullit për drejtësi, qytetarëve të zakonshëm për të gjetur drejtësi, të ardhmes duke u bërë barrikadë për të mos lejuar çlirimin përfundimtar të vendit nga diktatura e korrupsionit në drejtësi”.
Gjithashtu, Rama dha një mesazh të fortë për atë që tha se do të bëjë Vettingu pas 18 qershorit:
“Duhet të provojnë që vendimet e tyre kanë qenë në përputhje me ligjin e në rast të kundërt do duhet të përgjigjen për shkelje të Kushtetutës, për grabitjet e pronës, për shkeljet pa kriter e pa karar, i ka mbledhur bashkë në bunkerin e turpit ata që drejtojnë PD dhe ata që vazhdojnë të qëndrojnë në krye të sistemit të drejtësisë, janë të lidhur si mishi me thoin, por të jeni të bindur se në 18 qershor ne do ti zmbrapsim një herë e përgjithmonë, të jeni të bindur se bllokimi i Vettingut për të çliruar drejtësinë do mbarojë në 18 qershor, parlamenti i ri do votojë zhbllokimin brenda këtij viti. Ata që e kanë marrë peng le të shkojnë përpara drejtësisë së re, për mëkatet e krimet që kanë bërë”.
