Nënkryetarja e PD-së, Grida Duma dhe Sekretari i Përgjithshëm, Gazment Bardhi kanë dorëzuar në Gjykatën Kushtetuese, padinë për mos ngritjen e Komisionit Hetimor për çështjen Becchetti. Duma tha në një deklaratë për mediat se PD-ja do të bëjë gjithçka që 120 milion eurot të mos i paguajnë me lekët e shqiptarëve, por Edi Rama, që sipas tyre, është përgjegjës.
Dje, deputeti i Partisë Demokratike, Saimir Korreshi akuzoi kryeministrin Edi Rama se për shkak të luftës së tij personale, po detyron shqiptarët që t’i paguajnë 120 milionë euro, Francesco Becchettit. Korreshi tha se një vendim i tillë i godet të gjithë, për të paguar shpërdorimin që i bëri kryeministri shtetit shqiptar. Sipas deputetit, qeveria dhe kryeministri janë shkaktarët që penguan ngritjen e një komisioni hetimor lidhur me këtë çështje.
Pas dorëzimit të padisë, Grida Duma deklaroi se: “Padyshim fitorja e parë e PD-së është fakti që ata treguan publikisht që nuk miratojnë dot një Komision Hetimor, sepse janë të qartë që është një çështje e humbur. Komisionet Hetimore me ¼ e firmave të deputetëve mblidhen dhe janë të legjitimuar. PD-ja nuk mund të ndalojë në një fitore publike, mediatike. Rama ka frikë të hetohet, sepse është i dështuar, shkaktar për humbjen e 120 milionë eurove. 120 milionë euro i arbitrazhit ndërkombëtar që ndëshkon Shqipërinë dhe duhet ta paguajnë shqiptarët, shkaktarë janë ata duke influencuar dhe tek gjykatat shqiptare”.
Padia u paralajmërua të shtunën gjatë një konference të Lulzim Bashës me gazetarët. Ai tha se Rama po pengon ngritjen e Komisionit Hetimor për Becchetti-n.
