Sikundër e paralajmëroi një ditë më parë se do të flasë lidhur me akuzat e lëshuara nga ana e PD-së për viktimat e pandemisë, kryeministri thotë se do të prononcohet sot në orën 18:00.
Rama ka njoftuar se do të dalë ‘live’ për një bashkëbisedim të rëndësishëm me shqiptarët, për të shpjeguar akuzat për fshehjen e numrit të të vdekurve.
“Sot në 18:00, mesazhi im për shqiptarët pas akuzës makabre për fshehjen e numrit të të vdekurve! Faleminderit paraprakisht kujtdo që do të gjejë mundësinë të më ndjekë”.
Basha tha të enjten mbrëma në emisionin “Opinion”, se numri i të vdekurve nga virusi është dyfish i raportimeve nga qeveria. Por kjo deklaratë është hedhur poshtë nga kryeministri Rama.
Dje, Drejtoresha e Spitalit Infektiv, Najada Çomo, e shoqëruar nga mjekët që janë në frontin e parë për Covid-19, ka reaguar ashpër ndaj akuzave të kryedemokratit, i cili pretendon se numrat e vdekjeve nga koronavirusi janë të fshehura. Sipas mjekëve, këto situata janë tronditëse dhe vendosin në goditje profesionalizmin e tyre.
