Kryetari i PD-së, Lulzim Basha ka rikonfirmuar qëndrimin e opozitës për zgjedhje të parakohshme parlamentare.
Ai i ka qëndruar kërkesës për një qeveri tranzitore pa Edi Ramën kryeministër, teksa ka ripërsëritur paralajmërimin e tij se të gjithë ata që u përfshinë në vjedhjen e votave, do të shkojnë përpara drejtësisë dhe prapa hekurave.
“Të gjitha të dhënat tregojnë se sot opozita e bashkuar është shumicë qeverisëse edhe sikur zgjedhjet e lira e të ndershme të mbahen nesër”, theksoi Basha.
Më tej, Basha shtoi se edhe socialistët e ndershëm i thanë jo babëzisë së Edi Ramës dhe sejmenit të tij Taulant Ballës, hajdutit të mineraleve, subvencioneve të fermerëve të Librazhdit.
“Librazhdi, nën kujdesin e hajdutit nr 2 të Rilindjes, po vuan në çdo fushë. Po vuan fermeri, që nuk ka parë subvencion me sy, infrastruktura ka mbetur në vendnumëro, uji për vaditje është devijuar në turbinat private të taulant ballës, papunësia është ulur këmbëkryq. Biznesi i vogël është në një situatë edhe më të keqe. Dhe kjo reflektohet tek përkeqësimi i gjendjes ekonomike në familjet e tyre. Detyrat tona nuk kanë qenë kurrë më të qarta e më akute. Pas çlirimit të vendit nga kjo monstër, duhet të veprojmë me vendosmëri dhe saktësi kirurgjikale. Detyra jonë është t’i bëjmë të ditura këto propozime të planit tonë ekonomik, që shumica referendare “Rama Ik” të 30 qershorit ta kthejmë nga mazhorancë refuzuese të regjimit në një shumicë për ndryshim të vërtetë, që do të funksionojë për të gjithë, që ta prekin e gëzojnë të gjithë”, theksoi kryetari i opozitës.
