Presidenti Meta shprehu haptazi qëndrimin se është kundër planit për rishikimin e kufirit Kosovë-Serbi. I pyetur mbi deklaratën e ish-këshilltarit të Trump, John Bolton se ideja e shkëmbimit të territoreve ka ardhur nga vetë Prishtina dhe Beogradi, Meta tha se s’kemi nevojë për zgjidhje të vjetra ballkanike. Kreu i Shtetit shtoi më tej për mediat se çdo ide për ndryshim kufijsh, nuk i shërben idesë së themeleve të Evropës së bashkuar.
“Vlerësoj se pa u bërë pjesë e deklaratave apo komenteve të diplomatëve apo ish-përfaqësuesve të institucioneve të ndryshme, e ardhmja e Kosovës dhe Serbisë duhet të jetë në BE.
Është një objektiv i shpallur nga të dyja vendet dhe në BE pa asnjë diskutim çdo ide për ndryshim kufijsh nuk u shërben idesë së themeleve të Evropës së bashkuar. Dhe është e rëndësishme të punohet për aplikimin e standardeve të BE, pasi nuk mund të ketë zgjidhje paqësore dhe evropiane duke bërë llogari jo vetëm kufijsh por edhe qytetarësh në radhë të parë.
Zgjidhja është që të gjithë qytetarët serbë në Kosovë, dhe shqiptarë në Serbi të gëzojnë të drejtat si çdo minoritet, kjo është e vetmja zgjidhje paqësore dhe konstruktive dhe evropiane. Nuk besoj se Ballkani ka nevojë për zgjidhje të vjetra ballkanike, që kanë treguar se e shkatërrojnë të ardhmen”, tha ai.
I pyetur nëse ka një koment duke qenë se një individ që ka investuar në këtë çështje është ish-këshilltari i Edi Ramës, Toni Blair. A mendon ai se ka qenë i implikuar edhe kryeministri Rama? “Pavarësisht nga një informacion i tillë, falenderoj Britaninë e Madhe që ka një qëndrim të qartë për të ardhmen e këtij rajoni, që ta ketë vendin në BE, ku shpresojmë që të rikthehet edhe Britania në të ardhmen”, tha ai.
