Kryeministri Edi Rama ka folur troç lidhur me kërkesat e opozitës së bashkuar dhe si i kanë parë ndërkombëtarët këto kërkesa.
Duke iu referuar Samitit të Berlinit, Rama tha në mbledhjen e grupit të PS-së, se “nuk i zuri veshi asnjë fjalë”, duke hedhur poshtë thashethemet se ndërkombëtarët mbështesin opozitën dhe kërkojnë shtyrjen e zgjedhjeve lokale.
“Do të ishim vërtet në pozitë nëse nuk do kishim plotësuar detyrat e shtëpisë. Si mund të mos jemi me kokën lart kur ky nuk është rasti. Dolën me gramafonë e me filxhanë, kujtojnë se do ngrenë njerëz për të djegur institucionet shtetërore, policia dhe garda u përgjigjej ikur në kohën e tyre me kallashnikovë. Gjetën vetëm disa të verbër që janë në burg, për shkak të tyre.
U gënjen mendjen se do ta lënë Shqipërinë pa zgjedhje vendore, se u gënjen mendja që do gjejnë budallenj të sulmojnë për llogari të Lulit e të filxhanit. Nuk do gjejnë askënd t’i mbështesë. Me gjithë broçkullat që u tha për Samiti e Berlinit, u tha edhe që mua do më kërkonin shtyrjen e zgjedhjeve, u them që s’më zuri veshi asnjë fjalë. Zero!”
Duke theksuar sërish se PS do të hyjë në zgjedhjet lokale, me apo pa opozitën, kryeministri foli për rëndësinë që kanë ndryshimet në Kodin Penal.
Më tej, kryeministri foli edhe për sigurinë e produkteve që konsumojmë, për të cilat tha se janë të gjitha të shëndetshme, ndërsa për abuzimet paralajmëroi masa të ashpra.
“Në demokraci askush s’është i detyruar të hyjë në zgjedhje. Ndërsa për parti apo individ që u japin vetes të drejta s’ua njeh kushtetuta as ligji, ka një kapitull të veçantë në kushtetutën e Shqipërisë. Kodi Penal ka nevojë për disa ndryshime për mbarëvajtjen e jetës në vend, duke filluar nga siguria ushqimore. E vërteta është se kemi bërë jo pak, produktet tona bujqësore, ndryshe nga çfarë përflitet, janë plotësisht të shëndetshme. Në 300 mijë ton produkte bujqësore të eksportuara në 2018 në BE, asnjë kamion i vetëm nuk është thyer për shkak të cenimit të standarde evropiane. Ata që përfitojnë duke luajtur me shëndetin e njerëzve, do të dënohen ashpër. Ia kanë hedhur në 30 vjet me gjoba që s’janë asgjë, por kjo nuk do vazhdojë më kështu. Këto forca të së keqes që kërcënojnë shëndetin tonë dhe të fëmijëve tonë, do t’ju hiqet e drejta e lirisë së ushtrimit të aktivitetit dhe lirisë individuale.”/ Tirana Today
