Zgjedhjet në FSHF këtë vit po priten me interes të madh nga të gjithë shqiptarët, kjo për faktin se përballë Armand Dukës që kërkon mandatin e pestë radhazi del një figurë e fortë si Bashkim Fino. Për kandidaturën e deputetit të PS-së ka shumë akuza se ai po përfaqëson partinë dhe do të kapet sporti, por këto janë hedhur poshtë nga ai. Nga ana tjetër një lumë skandalesh i adresohen Federatës për manipulim zgjedhjesh, që lidhen me shoqatat fantazmë të cilat nuk figurojnë të regjistruara në gjykatë por kanë të drejtë vote.
Por ditën e hënë pritet që të ketë një bashkim mes kryeministrit Edi Rama dhe Presidentit të FSHF-së, Armand Duka. Me anë të një njoftimi, zyra për shtyp e institucionit ka bërë me dije se nesër në orën 11:00, do të organizohet një ceremoni inauguruese në Kompleksin “Dinamo” ku do të jenë të pranishëm Rama dhe Duka.
“Nesër në orën 11.00 në kompleksin “Dinamo” në kryeqytet, Presidenti i FSHF-së, Armand Duka dhe Kryeministri i vendit z.Edi Rama do të marrin pjesë së bashku në ceremoninë e nisjes së punimeve për ndërtimin e Shtëpisë së re të Futbollit Shqiptar. Ju ftojmë të merrni pjesë!”, njoftoi zyra për shtyp e FSHF-së.
