Kryeministri Edi Rama, në samitin e “Ballkanit të Hapur” që po mbahet në Ohër të Maqedonisë së Veriut, ka folur dhe për marrëdhënien e Serbisë me Rusinë, si dhe me Kosovën. Rama u fokusua tek Këshillimi Kombëtar i realizuar nga qeveria pak kohë më parë. I pari i qeverisë ka theksuar se nuk është pritur lufta në Ukrainë, për të ditur marrëdhënien speciale që ka mes Serbisë dhe Rusisë. Rama po ashtu u ndal edhe tek çështja e pazgjidhur mes Kosovës dhe Serbisë, por sipas tij, kjo mosmarrëveshje zgjidhet vetëm duke u afruar.
“Përtej të gjithë miqve dhe partnerëve të rëndësishëm, për ne “Ballkani i Hapur” është i rëndësishëm për njerëzit tanë. Për hapësirën e përbashkët në të cilën lindin fëmijët tanë e në të cilën nesër fëmijët tanë do marrin në duar fatet e vendeve tona. Këtë e dinë mirë shqiptarët e Shqipërisë që në Këshillimin Kombëtar ishin mbi 60% në mbështetje të “Ballkanit të Hapur”, që e kalon mbështetjen që ka qeveria dhe një shifër që jam i bindur do jetë më e lartë sikundër do ishte më e lartë nëse nuk do ishte bërë në fillim të pushtimit të Ukrainës ku filluan e zëra të dëshiruar për ta importuar konfliktin nga Ukraina në Ballkan përmes një retorike që është absurde dhe më falni ta them por është e pështirë.
Ne e dimë shumë mirë, s’kemi pritur luftën në Ukrainë për ta ditur marrëdhënien speciale që ka Serbia me Rusinë. Nuk pritëm luftën për të mësuar se mes Serbisë e Rusisë ka një histori, se mes Serbisë e Kosovës ka një konflikt ende të pazgjidhur.
Por midis të qëndruarit me kurriz nga e ardhmja dhe kthimit të syve drejt të ardhmes, ne kemi zgjedhur këtë të dytën.
Dhe sot jemi këtu pikërisht se duam të vazhdojmë të shkojmë drejt të ardhmes, pa i mbyllur sytë ndaj problemeve ende të pazgjidhura por të bindur se problemet e pazgjidhura mund të zgjidhen vetëm nëse ne afrohemi. Nëse ditë për ditë kuptojmë më mirë sa të rëndësishëm jemi për njëri-tjetrin”.
