Kryeministri Rama u shpreh në takimin me delegacionin e qeverisë së Kosovës, se ambicia e përbashkët e tyre është heqja përfundimtare e kufirit mes dy vendeve. Ai tha se mbetet me rëndësi që të dyja ministritë e Brendshme e dy qeverive, të intensifikojnë punën dhe të krijojnë një database të përbashkët për të mundësuar kontrollin në kohë reale të hyrjeve e daljeve në të gjitha pikat kufitare.
“Ambicia jonë është heqja e kufirit në funksion të zbatimit të 4 lirive të BE-së në rajonin tonë, duke nisur nga më e thjeshta dhe më kuptimplota heqja e kufirit mes Shqipërisë dhe Kosovës.
Është e rëndësishme që të dyja ministritë e Brendshme e dy qeverive të intensifikojnë punën dhe të krijojnë një database të përbashkët për të mundësuar kontrollin në kohë reale të hyrjeve e daljeve në të gjitha pikat kufitare të perimetrit tonë të përbashkët, që do na mundësonte hapjen përfundimtare të kufirit pa humbur asnjë centimetër në frontin e betejës kundër aktiviteteve të paligjshme dhe abuzimit me lirinë e lëvizjes”, tha Rama.
Rama deklaroi se Porti i Durrësit do shndërrohet de fakto një port edhe për Kosovën. Ai theksoi se më tej se Porti i Durrësit duhet të kthehet në një port strategjik për të gjithë rajonin.
“Shndërrimi i Portit të Durrësit në një port de fakto të Kosovës, do të trajtohet si një hyrje në Kosovë në momentin kur mallrat të zbarkojnë në Durrës. Ky është një hap i rëndësishëm, sepse Porti i Durrësit do të kthehet në një port strategjik.
Ambicia jonë nuk duhet të ndalet në një stacion apo pikë kalimi doganor, por me këtë marrëveshje ne do mundësojmë dhe ligjërisht njohjen automatike të agjentëve doganor të dy vendeve. Lehtësi këto që shënojnë hapjen e një kapitulli të ri të bashkëpunimit të mirëfilltë doganor.
Po realizojmë një port të përbashkët në Durrës, të Shqipërisë dhe Kosovës dhe të gjithë rajonit, që padiskutim kërkon vetiu një lidhje të shumfishtë që është hekurudha”, tha Rama.
