Muaj më parë kryeministri Edi Rama tha se në shtator të këtij viti, do të largonte ministrat, të cilët nuk i kanë përmbushur detyrat dhe detyrimet. Kjo gjë shkaktoi shumë polemika dhe debate në media, se cilët do të ishin emrat që do të iknin nga qeverisja. Të shumta ishin aludimet, por deri më sot asgjë e tillë nuk ka ndodhur. Tirana Today pyeti qytetarët se cilin ministër ata donin të largojnë dhe kush nuk po e bën punën siç duhet. Madje për disa prej tyre largimet nuk duhet të vijnë vetëm nga qeveria, por edhe nga opozita apo kryetari i Bashkisë Veliaj.
“Të gjithë duhet të largohen, asnjë nuk dua. Madje edhe Erion Veliajn sepse është hajdut. Asnjëri prej tyre nuk është duke e bërë punën siç duhet.”
“Asnjëri të mos rrijë më, madje dhe opozita duhet të ikë. Le të vijnë politikanë të rinj.”
“Na rëntë një luftë e madhe dhe vraftë Edi Ramën. A bën sens që ministri i Brendshëm të vazhdojë të rrijë në qeverisje. Sa për sy e faqe, pasi i vëllai përdor drogën dhe këtë nuk e gjen asgjë. Më i keqi nga të gjithë është Edi Rama.”
“Erion Veliaj është një nga më të keqit që duhet të ikë. Na çau kokën me ato ‘mbolla pemë’ përditë. Nuk e hap dot televizorin.”
“Të vijë edhe njëherë ai që ka qenë më parë. Ai shoku i famshëm që vdiq e shkoi. Iku ai, iku dhe shpresa jonë.”
“Kush vlen, më thuaj një që vlen?! Si nuk po e bëjnë ata, ngelën me pushime jashtë shtetit e harxhojnë paratë tona”.
“Ka mbledhur ca goca të reja, që as nuk e dinë se çfarë do të thotë të jesh ministre.”
Një qytetar i cili është punonjës në Bashki, u shpreh i revoltuar se për të të gjithë janë të korruptuar.
“Nuk kemi shpresë ne tek ata që janë në qeverisje. Të gjithë janë të korruptuar. Unë punoj në Bashki si shofer, por ama nuk kam frikë të flas. Madje flas me gjithë shpirt sepse jemi ngopur me këta politikanë. Le të më heqë nga puna ai që tani, ama kjo është e vërteta. Po bëjnë që të gjithë të ikin, po na largojnë fëmijët.”
Ndërkohë të tjerë shprehen se disa ministra si ai i Infrastrukturës dhe Energjisë, Damian Gjiknuri, nuk po e përballon dot punën, prej bashkimit të ministrive.
“Gjiknuri është shumë i ngarkuar me dy ministri. Mendoj që është bërë një gabim i madh në këtë pjesë, sepse nuk po e përballon dot punën. Por, ministrat e tjerë janë duke punuar ashtu siç duhet.” TIRANA TODAY
