Për të parandaluar përkeqësimin e situatës nga pandemia, qeveria shqiptare tashmë ka gati një plan menaxhimi në vjeshtë. Kryetarja e Komitetit Teknik të Ekspertëve, Mira Rakacolli ka zbuluar ndër të tjera në një intervistë për “Report Tv” se po punojnë për të bërë edhe një fushatë vaksinimi për gripin.
Rakacolli tha se po përfundojnë strategjinë vjeshtë-dimër dhe pranverën e ardhshme, në lidhje me survejancën dhe më pas organizimin e sistemit shëndetësor për përballimin e skenarëve të ndryshëm, që mund të ndodhin së shpejti. Ajo e cilësoi si një sfidë më vete stinën e vjeshtës, pasi nuk dihet qartë se sa zgjat imunizimi, qoftë ai natyral qoftë nga vaksina.
“Vjeshta është sfidë sivjet, sërish do të shikojmë sesa influencon virusi, pasi akoma nuk dihet qartë se sa zgjat imunizimi qoftë ai natyral qoftë nga vaksina. Do të shikohet sa zgjat imunizimi, nëse do mund të dalin variante të tjera. Do jetë edhe ngritja e infeksioneve të tjera. Vjeshtën e kaluar mbizotëroi infeksioni i COVID, nuk patëm raste gripi. Si të thuash ky virus i mbyti viruset e tjerë. Por në këtë vjeshtë mund të kemi sërish gjallërim të këtyre infeksioneve, dhe jemi duke punuar edhe për të bërë një fushatë vaksinimi për gripin dhe kemi porositur edhe vaksina për gripin në mënyrë qe të përballemi me një skenar jo të këndshëm. Jemi duke përfunduar strategjinë vjeshtë-dimër dhe pranverën e ardhshme, në lidhje edhe me survejancën dhe me organizimin e sistemit shëndetësor, për përballjen e skenarëve të ndryshëm që mund të ndodhin dhe do ta lançojmë së shpejti”, u shpreh Rakacolli.
