Ndryshe nga vitet e shkuara, situata me pandeminë ka ndryshuar rrjedhën e jetës. Ministrja e Arsimit, Evis Kushi, ndonëse nuk ka dhënë një datë fikse se kur nxënësit do të rikthehen në bankat e shkollës, ka konfirmuar se pushimet dimërore do të zgjasin më shumë.
Në një bisedë në studion e ABC, ajo tha se Ministria e Arsimit është në komunikim të ngushtë me Komitetin Teknik, për vijimësinë e zhvillimit të mësimit.
Kushi sqaroi se ende nuk është marrë vendimi, ndërsa dha dy data të vlerësuara si më të përafërta për nisjen e fillimit të shkollës pas pushimeve, kryesisht data 11 dhe 18 janar.
“I vetmi sinjal që kemi është që pushimet dimërore do të jenë më të gjata. Akoma nuk e kemi vendosur nëse do të jetë 11 apo 18 janar fillimi i shkollës. Theksoj se dinamika e pandemisë, do të ndikojë në vendimmarrje”, tha Kushi.
