Dalin detaje lidhur me arratisjen e 23-vjeçarit shqiptar nga burgu Avlona, në Greqi. Albion Xhezairi u arratis ditën e hënë bashkë me një sirian, por u arrestua një ditë më vonë nga autoritetet greke.
Sipas mediave vendase, i riu kishte shkruar në një zarf përpara se të largohej se: “Është e rrezikshme të ikësh.”
Ai kishte bashkëpunuar ngushtë me sirianin për të ikur prej andej, ndërsa të burgosurit dëshmojnë se ata të dy njiheshin dhe siriani punonte si kuzhinier në burg.
Duke qenë në këtë “funksion”, siriani kishte vënë re prej kohësh se ku mund të kishte hapësira boshe për t’u arratisur. Ata të dy u takuan të hënën në mbrëmje, pas një plani paraprak për të ikur nga burgu. Ata arritën të thyejnë një derë dhe dolën në oborrin, e mbushur me mbeturina e sende të tjera. Ata prenë një tel në atë që quhet si “zonë e vdekur” e burgut.
Pasi arritën te “gardhi rrethues”, ata gjetën një hapësirë ku nuk kishte rrjet teli. Shqiptari dhe siriani hipën sipër dhe dolën prej andej.
Xhezairi është dënuar për shitje e prodhim lëndësh narkotike, pjesëmarrje në organizatë kriminale, ndërsa është dënuar edhe në Shqipëri për vrasjen e Aleksandër Bardhit në Sarandë.
