Komisioni Evropian do të publikojë sot pasdite, progres-raportin për Shqipërinë, lidhur me integrimin në union. Klan News ka arritur që ta sigurojë këtë raport dhe zgjedhjet kanë një pjesë të rëndësishme të ecurisë së Shqipërisë.
Sipas BE, Reforma Zgjedhore e miratuar para zgjedhjeve të 25 Prillit ishte gjithëpërfshirëse dhe zgjedhjet ishin të organizuara mirë.
“Administrata e re zgjedhore fitoi besimin e shumicës së aktorëve. Shqetësimet mbetën të lidhura me keqpërdorimin e burimeve publike ose funksioneve zyrtare, pretendimet për blerjen e votës dhe rrjedhjen e të dhënave të ndjeshme personale që mbulojnë preferencat politike të qytetarëve. Këto raste janë duke u hetuar”, theksohet në raport.
Më tej teksa flitet për forcimin e demokracisë, në progres raport bëhet me dije se është krijuar një mjedis i favorshëm për shoqërinë civile.
Një tjetër pikë për të cilën zyrtarët e BE kanë punuar dhe kanë dalë në përfundime është dhe sistemi gjyqësor. Theksohet se Shqipëria ka vijuar të zbatojë Reformën në Drejtësi dhe fokusi është vendosur tek plotësimi i vendeve vakante në Gjykatën Kushtetuese dhe atë të Lartë.
Po ashtu dhe për Vetting-un thuhet se ka përparuar në mënyrë të qëndrueshme. Për sa i përket punës së SPAK në progres-raport theksohet se Shqipëria po bën përpjekje për luftën kundër korrupsionit dhe krimit të organizuar.
Kritika ka për respektimin e të drejta të pakicave kombëtare, po ashtu edhe për sa i përket lirisë së medias dhe qasjes së qeverisë me pushtetin e katërt deklarohet se nuk është progres mjaftueshëm.
“Tensionet midis aktorëve politikë dhe gazetarëve janë rritur gjatë krizës COVID-19 dhe në kontekstin e zgjedhjeve parlamentare. Sulmet e raportuara kundër gazetarëve nuk kanë rezultuar në asnjë dënim përfundimtar”, thuhet në raport.
Një tjetër pikë në të cilën ndalet progres-raporti ka të bëjë dhe me kërkesat për azil të shqiptarëve. Sipas raportit thuhet se në vitin 2020 ka pasur një ulje me 66% të kërkesave, por kjo rënie ka ardhur si pasojë e bllokimit të udhëtimeve nga pandemia e Covid-19.
Në fund duke u ndalur tek ekonomia, theksohet se Shqipëria ka bërë përparime por jo aq sa duhet./tvklan.al
