Kryeministri Edi Rama ka sqaruar se pse hapja e restoranteve dhe bareve përbën një rrezik të madh për përhapjen e koronavirusit.
Kreu i qeverisë ka shpërndarë në Facebook një video, ku ekspertët shpjegojnë me prova se çfarë mund të sjellë hapja e këtyre bizneseve.
Në shembullin e dhënë nga eksperti amerikan në video, tregohet se si vetëm një person i infektuar në tavolinë, kishte bërë që të infektoheshin edhe njerëz nga tavolina të tjera.
“Një shpjegim i thjeshtë për rrezikun e Fazës 2 dhe posaçërisht për psenë e rrezikut më të madh të restoranteve e të bareve, që ende nuk janë hapur askund! Sjellja individuale mbetet garanti numër 1 i fazës 2”, shkruan Rama.
Më datë 20 dhe 27 prill, në Shqipëri u hapën disa biznese të cilat kishin prej 1 muaji që kishin pezulluar aktivitetin. Mirëpo baret dhe restorantet nuk janë hapur akoma, pasi qeveria i cilëson ato si biznese me risk të lartë.
